Sguard inavo
Quia as chatta üna survista da tuot las exposiziuns specialas chi sun gnüdas fattas ils ultims ons illa Stamparia Strada.
2022: Penna d’ocha, Gutenberg, chat da gruppa: Co cha la tecnica revoluziunescha la comunicaziun
In desch museums grischunais exploreschan ils visitaders davent da prümavaira 2022 il temp medieval in ün möd liger. Aint illa Stamparia pon ils visitaders cular scrittüras, tipografar texts cullas letras da plom, far palperi e stampar precis sco dal temp medieval.
Direcziun da l’exposiziun: Thedi Gut
Scenografia e grafica: Madlaina Janett & David Bühler
2020/21: Unità, discordia, vaschinanza: Il cunfin il plü nouv da la Svizra
L’ultim grond spostamaint da cunfin es capità dal 1868 in Engiadina Bassa, 20 ons davo la fundaziun da la Confederaziun. L’exposiziun ha muossà l’istorgia fascinanta, co chi s’han fuormadas dad ün territori omogen dal temp medieval trais regiuns cun linguas, confessiuns e naziunalitats differentas chi sun separadas da cunfins.
Direcziun da l’exposiziun: Thedi Gut, Dr. Alexandra Könz
Scenografia e grafica: Madlaina Janett & David Bühler
2018/19: Stampa 3D: Co ch’üna tecnologia müda nossa vita
In occasiun dal giubileum da 30 ans d’existenza drizza il Museum Stamparia Strada il sguard vers il futur dal squitsch tridimensiunal. In üna survista la plü vasta da nos pajais tschercha quist’exposiziun üna resposta sülla dumanda co cha’l squitsch 3D po influenzar e müdar nossa vita. Noss’exposiziun da giubileum illustrescha in möd pratic cun sqitschs 3D fascinants our da l’industria, perscrutaziun, moda ed art, e fa dvantar cun quai quista tecnologia inclegiantaivla.
Direcziun da l’exposiziun: Thedi Gut, Dr. Alexandra Könz
Scenografia e grafica: Madlaina Janett & David Bühler
2016/17: Chastels in Engiadina: Da la fortezza al palazi
Ruinas pittorescas sün muottas giagliardas, tuors aint ils cumüns ed imposants chastels dan la taimpra a l’Engiadina. L’exposiziun speciala 2016/17 muossa davent dal temp dal cumanzamaint fin al temp da culminaziun e la decadenza dals chastels in Engiadina. Üna gronda charta dà üna survista. Texts e purtrets preschaintan ils 25 edifizis ils plü importants. cialmaing es dedichada l’exposiziun al chastè da Tarasp, chi’d es gnü restorà excellentamaing, sco eir a la imposanta ruina dal chastè da Tschanüff a Ramosch.
Direcziun da l’exposiziun: Thedi Gut, Dr. Alexandra Könz, Alfons Clalüna
Scenografia e grafica: Madlaina Janett & David Bühler
2015: Strada – Turich retuorn / Zürich – Strada und zurück
L’exposiziun speciala es dedichada a l’istorgia da la musica populara svizra chi ha cumanzà a Turich e l’effet per la musica populara engiadinaisa. La musica populara engiadinaisa ha survgni impuls da la musica populara svizra chi han inspirà da sia vart. Quista exposiziun es gnüda muossada dal 2016 eir illa Tonhalle a Turich.
Direcziun da l’exposiziun: Thedi Gut, Alexandra Könz, Madlaina Janett
2014: Ferm tabac!
Musica populara e musica instrumentala in Engiadina Bassa d’eira il tema da l’exposiziun speciala 2014 – ün omagi a la musica populara ed a la musica instrumentala, a lur cumponists, lur cumposiziuns e lur interprets dal cumanzamaint fin al di d’hoz.
Direcziun da l’exposiziun: Alexandra Könz
2013: Attentiun: falsificaziun!
L’istorgia da las bancanotas svizras e lur falsificaziun es gnüda surtutta dal Museum Gutenberg a Fribourg. Quella es gnüda fatta in collavuraziun culla banca Naziunala Svizra e muossa las «rosinas» our da 100 ons istorgia da las bancanotas svizras.
Direcziun da l’exposiziun: Thedi Gut