La Stamparia Strada organisescha visitas guidadas e lavuratoris illa veglia stamparia, tuot tenor Lur giavüschs – per scoulas, gruppas privatas o per imbellir ün viadi da l’affar.
Ch’Els giodan ün gir guidà cumpetentamaing tras l’exposiziun permanenta! I’s po admirar ils stupends cudeschs vegls chi sun gnüts stampats illa stamparia. Els vegnan a savair co cha’l mansteran cun ufficina, la pauraria ed abitar pudaivan coexister suot ün tet. Ün’invista in nos parc da maschinas istoric es alch unic. Nus ans adattain a Lur giavüschs.
Dumondas per üna visita guidada
Persunas cumpetentas san metter in funcziun las veglias maschinas da stampar da la Stamparia Strada chi funcziunan amo fich bain. Els pon far lur agen palperi, pon dvantar per ün mumaint giarsun stampadur a la veglia e squitschar culla pressa mecanica a schnuogl.
Fich populars sun ils lavuratoris illas seguaintas spartas:
Tuot il material chi’s douvra per far svess palperi sta a disposiziun. Fibras pitturadas vegnan scholtas cun aua ad üna mösa. Ün cribel cun ün segn da l’aua vain sfuondrà aint illa mösa e lura dozà oura precautamaing. Davo laschà sguottar bain sto il palperi chi vain s-chaffi amo gnir pressà e süantà.
Els han la pussibiltà dad imprender a cugnuoscher l’adöver dad ün crötsch ad angul (Winkelhaken) e l‘adöver da las letras. Els piglian ils güsts custabs culla pincetta our da las troclinas e tils mettan insembel in üna lingia cumpletta. Quist tuna plü simpel co quai chi’d es: i’s metta illa scrittüra reflexa. Ils profis pon as ris-char vi da la collecziun da notas da musica, dovrada daspö tschientiners illa Stamparia, provar da metter in lingia üna melodia!
I’s po stampar culla pressa mecanica a schnuogl cun aigna forza sül palperi da chartas chi s’ha s-chaffi. Id es eir pussibel da güdar a metter ad ir la cuntschainta pressa automatica «Propeller-Tiegel».
Sch’Els han giavüschs specials per üna visita guidada o per lavuratoris, ch’Els contacteschan cun nus via Email. Nus agradin gugent Lur giavüschs.