Istorgia da la Stamparia Strada
L’istorgia dal museum va inavo fin dal 1689. Quel on ha Nuot Cla Janett installà quia sia stamparia. Fin dal 1881 esa gnü tipografà e stampà in quista chasa. Dal 1998 ha rivi il Museum Stamparia Strada sias portas.
Nuot Cla Janett d’eira activ vi da la «Sacra Bibla» sco stampadur principal ill’ufficina a Scuol. Dal 1679 ha’l surtut üna da las pressas da stampar ed ha rizzà aint si’aigna ufficina «Stamparia nuova, Celino, da Ludovico Nicolò Ianetto». Dal 1689 ha Janett fat müdada cun tuot sia stamparia illa chasa dal museum dad hoz a Strada.
L’istorgia dal museum e l’importanza da la stamparia istorica a Strada quai es documentà stupend in ün film da Stefan Muggli (portader dal premi dal publicum 2011 al festival da film a Turich). Ils purtrets muossats quia dan üna prüm’ impreschiun da quist’ ouvra; tuot il film vain eir muossà aint il museum.
Purtrets: © 2016 Instantview
Quista bella chasa engiadinaisa es gnüda fabrichada la fin dal 16avel tschientiner. Quia han stampà Nuot Janett e seis descendents üna remarchabla quantità dad importants cudeschs istorics-culturals, la gronda part in rumantsch. Eir üna gazetta, «Il Progress», es gnüda stampada illa Stamparia Strada. Dal 1818 ha surtut la famiglia S-charplaz la stamparia e tilla gnü in funcziun fin dal 1881.
Dürant ils prossems 100 ons han abità rapreschentants da la famiglia S-charplaz aint illa chasa da l’anteriura stamparia. Davo la mort da l’ultim abitant es la chasa gnüda portada aint in üna fundaziun culla mera da mantgnair la veglia stamparia. Cun agüd dal cumün da Valsot, dal Chantun Grischun e da la Confederaziun es la chasa gnüda renovada in möd moderà e confuorm al stil.
Grazcha a l’enorm ingaschamaint da Hans Kobler (1929 – 2012) ha pudü gnir realisada l’idea d’ün museum. Hans Kobler es stat president da la società da promoturs e lura eir da la fundaziun. Cun ün’energia instancabla ha el ramassà ils mezs finanzials per adattar la chasa da l’anteriura stamparia a las pretaisas dad ün museum modern e per drizzar aint locals d’exposiziun attractivs. Dal 1998 ha pudü gnir inaugurà il Museum Stamparia Strada.
Il Museum Stamparia Strada appartegna pro’ls bains culturals d’importanza naziunala tschernüts dal departamaint da l’intern federal. Il museum es commember da l’associaziun dals museums svizzers.