Exposiziun permanenta
L’exposiziun permanenta muossa fich visibel co chi gniva tipografà, stampà e lià dal 17avel fin al 19avel tschientiner propi aint ils locals da la chasa dal museum. Exponats unics da la vasta collecziun da cudeschs rumantschs istorics cumpletteschan l’exposiziun. La cultura d’abitar e la musica in Engiadina Bassa as chatta in secturs separats.
La stamparia
Far palperi
Ils instrumaints importants per far palperi a man sun exposts; tanter oter ün cribel, segns da l’aua e la pressa. Ils visitadurs pon (cun reservar) far lur agen palperi, muni cun ün segn da l’aua. Davo cha’l palperi es süt esa la pussibiltà da squitschar alch sül palperi.
Tipografar
Üna copcha d’üna chaistina cun letras per differentas scrittüras chi gniva dovrà illa Stamparia Strada es exposta. I vain declerà co chi gniva tipografà cun letras e notas da musica avant tschientiners. I vain eir demonstrà la maschina da stampar «Linotype» dal 1954.
Ils visitadurs pon metter insembel las letras per stampar in lingia sün ün crötsch ad angul. Uschè as vegna a cugnuoscher l’invenziun geniala da Gutenberg co chi’s po stampar repetidamaing tenor plaschair.
Stampar
Ün object da parada es la pressa mecanica a schnuogl chi funcziuna. Quella es gnüda copchada exactamaing da l’original chi’s rechatta i’l museum retic a Cuoira. Dürant il 17avel e 18avl tschientiner gniva stampà cul original a Strada. Insembel cun las pressas automaticas «Tiegel» e la pressa automatica a retegn as vezza il svilup da la tecnica da stampar fin al di d’hoz.
Liar cudeschs
Illa partiziun da liar cudeschs as poja observar ils differents pass d’üna pagina stampada fin pro’l cudesch lià a man. Quia sun eir expostas differentas üsaglias veglias per liar cudeschs chi inrichischan quist sectur.
La cultura d’abitar
Il cumün fusiunà Valsot d’eira eir dal 16avel fin al 19avel tschientiner il cumün rumantsch cunfinand cul Tirol, ingio chi gniva discurri tudais-ch. Quai ha influenzà il möd da viver da la rumantschia. Prüvadas stanzas cun lur originalità muossan co cha abitar, la stamparia ed üna pitschna pauraria existivan insembel in l’istessa chasa in quist cumün al cunfin.
La musica
Musica populara ha in Engiadina Bassa, pustüt a Valsot fermas ragischs. A Tschlin es nada la musica dals Fränzlis, amo hozindi fich predschada. Instrumaints originals, fotografias istoricas e notas da cuntschaintas fuormaziuns as poja verer in stüva.
